Þvottur

Ég prófaði að handþvo fötin mín í dag. Ég hef aðgang að þvottavél en hún er því miður ekki í sameiginlega rýminu og vegna þess að mig grunaði að það væri ekki mikið mál að gera þetta bara á gamla mátann í staðinn, þá ákvað ég bara að prófa það. Þetta var ekkert mál, ég skellti fötunum í bala ásamt heitu vatni, stráði yfir þvottaefni og velti fötunum uppúr þessu og hnoðaði vel, skolaði svo með heitu vatni, vatt fötin og hengdi þau upp á þurrkgrind. Ég hefði notað mýkingarefni líka ef ég hefði ekki gleymt að kaupa það. Þetta tók kannski 15-20 mínútur og fötin ilma alveg jafn vel og úr þvottavél svo ég held að ég þvoi bara svona þar til ég flyt í íbúð. Þetta er ekkert mál fyrir einstakling þó að öðru máli gildi auðvitað þegar verið er að þvo af heilli fjölskyldu. Ég gekk sandinn í dag (þessa ~7 kílómetra) en sleppti því í gær því að mér leið mjög illa í fótunum eftir að hafa reynt að skokka þetta í nokkur skipti. Ég átti mjög erfitt með að hemja mig og rjúka ekki út, því mig langar svo að komast í form. Það er greinilega of mikið fyrir mig ennþá að skokka svona langa leið svo ég verð að hlífa liðamótunum og ganga megnið af leiðinni þar til líkaminn þolir meiri þjösnagang.

Mun betra

Þetta er allt annað líf hjá mér núna, að vera kominn í alvöru herbergi með sér baðherbergi (með sturtu, klósetti og vaski) og sameiginlegri stofu og eldhúsi. Mér líður mjög vel hérna, leigan er lág svo ég get sparað og herbergið er á besta stað í bænum því að héðan er stutt í allt nema reyndar matvöruverslanirnar, en til þess er nú bíllinn! Það er krá hérna stutt frá, bakarí, hársnyrtistofa, bíó, krambúð, líkamsræktarstöð og fleira. Það er  líka stutt í bæði vinnuna og sundlaugina en þó aðeins lengra, samt undir einum kílómetra. Ég er búinn að fara eina ferð í bæinn að sækja dót í herbergið mitt svo það er orðið heimilislegt og skemmtilegt, er t.d. búinn að setja fiskabúrið mitt upp en í því eru flottir gúbbífiskar sem hafa nú þegar gotið nokkrum seiðum! Ég er búinn að finna mér frábæra skokkleið sem kallast ,,sandurinn," en það er 3,6 km löng sandfjara sem er alveg æðislegt að skokka eftir daglega, og það besta er auðvitað að hafið, með sínum flóðum og fjörum, sér til þess að þar er aldrei svell. Í gærkvöldi var mér boðið í heimahús í fyrsta sinn (af vinnufélaga) og við hittumst þar nokkur, drukkum og fórum svo niðrí bæ á krána sem er rétt hjá herberginu mínu. Það var því aldeilis þægilegt að koma sér heim þegar ég var búinn að fá nóg af ,,djamminu," ég var kominn heim eftir aðeins tuttugu skref eða svo! Mig langaði mikið að komast til Hólmavíkur í kvöld á þorrablót en því miður er víst spáð ljótu veðri í kvöld svo ég er hættur við að fara. En ég stefni þá á að mæta í Góuveisluna í staðinn. Ég læt þessar fréttir duga af mér í bili, meira næst.

Tíminn líður sem betur fer

Nú er ég búinn að vera á Króknum í 13 daga en ég flutti hingað eins og fyrr segir 2. janúar og fór í bráðabirgðaherbergi á vegum sláturhúss bæjarins (á Kirkjutorgi 1, við Skagfirðingabraut). Síðan mætti ég í skoðunarferð í fiskiðjuna (Fisk Seafood ehf.) þann 3. og 4. janúar var svo fyrsti vinnudagurinn minn. 10. janúar fékk ég fyrsta launaseðilinn, en reyndar fékk ég bara  greiddann út fyrsta vinnudaginn sem ég vann vegna þess hvernig launatímabilið liggur, en ég fæ semsagt útborgað vikulega (á hverjum fimmtudegi) eins og algengt er í svona störfum. Næsta fimmtudag fæ ég fyrstu heilu vinnuvikuna greidda svo að ég ætti loksins að fara að eiga eitthvað fé eftir það.

Á morgun (16. janúar) flyt ég loksins í framtíðarhúsnæðið mitt, allavega um óákveðinn tíma en ég verð þar líklega í minnst í eitt ár. Þetta er herbergi á Kaupangstorgi 1, en eiginlega ætti það frekar að tilheyra Aðalgötunni (þá við Aðalgötu 1), en húsið er munaðarlaust í þeim skilningi að það átti að vera eitt fleiri húsa sem stæðu við Kaupangstorg nokkuð, en svo varð ekkert úr gerð torgs þessa og til að fólk finni nú húsið verður að vísa á Aðalgötuna sem húsið stendur við. Semsagt, bara skipulagsklúður. Helsta kennileitið nálægt nýja húsnæðinu mínu er Ólafshúsið en það er frægt hús hér í bæ og veitingastaður, 2 húsum frá.

Ég hlakka mjög til flutninganna því að þetta sláturhúsaherbergi og í raun húsið allt er ekki upp á marga fiska. Nýja herbergið mitt er 15 fermetrar að stærð, á 2. hæð og með sér baðherbergi (klósetti, sturtu og vaski) og stórum glugga og ekki undir súð eins og núverandi herbergi (sem er á 3. hæð). Ég mun einnig hafa aðgang að eldhúsi og stofu sem ég deili með öðrum herbergjaleigjendum, en þetta húsnæði átti upphaflega að vera gistiheimili.

Í fyrstu stefndi ég á að komast í leiguíbúð strax, en ég hef ákveðið að láta mér þetta herbergi nægja því að það er ódýrara og gerir mér auðveldara um vik að safna frekar upp í lágmarksupphæð fyrir láni til íbúðarkaupa, sem er auðvitað mun skynsamlegra en að brenna laununum í leigukostnað á íbúð. Það er alltaf betra að eiga en leigja held ég, allavega þegar um húsnæði er að ræða og til að geta gert þetta ætla ég að reyna að safna mér einni milljón króna á um það bil 12-15 mánuðum. En áður en ég byrja að spara verð ég auðvitað að klára að borga yfirdráttinn, bílatryggingreikninginn og smá lán sem ég fékk frá foreldrum mínum svo ég hefði nú fyrir mat á Króknum fyrstu dagana! En þetta ætti að vera afgreitt mál á eins og einum mánuði, og eftir það er bara að vera duglegur og agaður í þessu. En jæja, þetta er orðið gott í bili, meira seinna!

E.s. ég býst við að skreppa til Reykjavíkur næstu helgi til að sækja fiskabúrið mitt og annað dót og auðvitað að heilsa upp á fjölskyldu og vini. Sjáumst vonandi þá

Jamm, gengur vel á Króknum

Lífið er búið að vera ágætt hér á Króknum þessa fáu daga sem ég hef verið hér. Mér finnst alltaf betur og betur að ég hafi tekið rétta ákvörðun. Það var gaman í vinnunni fyrsta daginn (og þann eina þar til eftir helgi) og mér líkar vel við fólkið sem ég er að vinna með. Ég er þessa stundina í bráðabirgðaherbergi sem er ekki upp á marga fiska en ég er svo heppinn að hafa verið boðið 15 fermetra herbergi eftir helgi með vaski, eldunaraðstöðu, húsgögnum og fleiru sem maður nauðsynlega þarf á að halda. Ég vona að mér líki herbergið það vel að ég láti það duga í bili. Þá get ég reynt að einbeita mér að sparnaði þar til ég finn mér íbúð seinna. Spurning hvort ég kíki ekki á krá niðrí bæ á eftir, það held ég nú!

Brottför á morgun

Nú er ég orðinn yfirspenntur, það er svo stutt í ferðalagið mitt norður á Sauðárkrók. Óvissan er algjör. Ég hef aðeins örfáum sinnum komið þangað, en nú er ég að fara að vinna þarna. Á morgun fæ ég herbergið sem mér tókst að redda mér (sem er á vegum sláturhússins), daginn eftir er starfskynningin, og daginn eftir það er fyrsti vinnudagurinn minn en þar sem það er á föstudegi er ég svo strax kominn í helgarfrí eftir fyrsta daginn, nema jú auðvitað að ég verði beðinn um að vinna helgarvinnu. En jæja, það er best að fara að tína saman restina af farangrinum og koma honum í bílinn. Ég reikna með að leggja af stað fyrir hádegi á morgun, það er allavega gott færi eins og er svo ég þarf ekki að hafa áhyggjur af því. Takk fyrir gamla árið og hafið það sem allra best á því nýja. Óskið mér góðs gengis!

Sorg og gleði

Ég missti góðan vin minn í dag, Snaran. Tennurnar voru orðnar ónýtar og aðgerð hefði verið erfið með litlum batalíkum. Hans verður sárt saknað en hann var kelinn og forvitinn svo ég held að hann hafi verið nokkuð sáttur hjá mér. Bróðir hans (Snöggur! Ekki góð nafnasamsetning?) átti við sama vandamál að stríða og var svæfður í vor, svo þetta virðist vera algengt vandamál hjá naggrísum. En Snar varð tæplega fimm ára sem jafngildir því líklega að verða 65 ára í mannsárum, en naggrísir verða venjulega mest sjö ára gamlir. Það þýðir samt auðvitað sjö ára ábyrgð svo að fólk ætti ekki að fá sér naggrísi (eða önnur langlíf dýr) ef það er ekki reiðubúið að hugsa um þau alla ævi þeirra. Ég gerði það þrátt fyrir að það væri pínulítið erfitt eftir að ég varð fátækur námsmaður, en ég sé alls ekki eftir að hafa fengið mér þá. Þeir voru frábærir félagar, sérstaklega þegar ég var stundum einn. En ástandið lagaðist reyndar mikið hjá mér stuttu eftir að ég keypti þá, því að vinahópurinn stækkaði og allt í einu var ég svo kominn með kærustu, þó það samband sé reyndar búið núna!

Ég hef ekki bara leiðinlegar fréttir að færa, heldur líka frábærar. Mér tókst nefninlega í dag, með hringingum í all nokkuð mörg símanúmer, að redda mér herbergi á Sauðárkróki tímabundið þar til ég redda mér leiguíbúð, sem er auðvitað langtímamarkmiðið. Herbergi þetta er á vegum sláturhússins en þar sem engin slátrun fer fram á þessum tíma eru væntanlega mörg herbergi laus, en reyndar var mér sagt að ég væri ekki eini starfsmaður landvinnslunnar sem verð þarna, það eru nokkrir búnir að vera þarna um tíma. Það er ágætt, þá kynnist ég kannski einhverju fólki betur. En jæja, fleiri fréttir seinna, ég er með í maganum af spenningi og af óvissunni við að flytja norður á Krókinn, en ég held að þetta verði gæfurík ákvörðun hjá mér.

 

 

Gleðileg jól!

Gæfan er með mér núna. Ég er kominn með vinnu á Sauðárkróki og hlakka mjög til að flytja þangað og prufa að búa á nýjum stað og kynnast nýju fólki. Krókurinn er stór bær en ekki of stór, vel staðsettur, með góða þjónustu og með hitaveituvatn, er hægt að biðja um meira? Eina vandamálið í augnablikinu er að ég er ekki búinn að finna mér húsnæði, en ég er það ákveðinn í að komast á Krókinn að ef ég verð óheppinn og finn ekkert fyrir janúarbyrjun þá fer ég frekar á gistiheimili til að byrja með en að hætta við. Það bara kemur ekki til greina að láta þetta tækifæri úr greipum renna. Ég líka verð að vinna og fá tekjur, og ég er búinn að hlakka lengi til að klára skólann (næstum búinn!) svo ég geti farið að vinna allt árið. Lífið er búið að vera í pásu í þrjú ár vegna peningaleysis, og ég geri mér fulla grein fyrir að ég er líklega að fara að fá lágmarkslaun til að byrja með, en það skiptir ekki máli, bara að ég sé með stöðugar tekjur, hitt kemur með tímanum. Ég er mjög sparsamur og mín áhugamál eru ekki dýr (nema ferðaáhuginn), en ef maður er í skóla og ekki með neinar tekjur á veturna, þá er alveg sama hvað maður er sparsamur, peningarnir klárast fljótt og þá er maður nánast úr leik í samfélaginu, því að næstum allt kostar peninga, að minnsta kosti einhverjar krónur. Það er bara óþolandi ástand að hafa ekki einusinni efni á að kaupa sér flík heilu mánuðina, en nú er sá tími á enda og framtíðin er björt. Eins og þið sjáið er ég búinn að aflæsa blogginu á ný svo það sé ekkert vesen að kíkja við! Gleðileg jól vinir og vandamenn og vonandi hitti ég ykkur sem flest áður en ég fer í burtu á nýja árinu og hafið það sem allra best.

Mmm, jólabjór!

Heilt á litið er ég ekkert fyrir áfengi. Það líða stundum allt að fjórir mánuðir á milli þess að ég drekki. En ég kaupi stundum léttbjóra og fæ mér eins og 2-3 slíka um helgar því að mér finnst bjór einfaldlega svo bragðgóður. Ég er ekkert fyrir alvöru fyllerí en enda þó alltaf á eins og 3-5 slíkum á ári. Maður verður nú að sleppa sér einstaka sinnum í góðra vina hópi, ég kæmist ekki einusinni upp með annað! En eins og ég segi, ég hugsa samt alltaf í upphafi ,,úff, nú byrjar ballið," en síðan skemmti ég mér auðvitað ærlega og allt er svo æðislegt (þið kannist við þetta, er það ekki?! ), svo kemur þessi hörmungar, hryllings morgundagur þar sem maður er ófær um að gera nokkurn hlut og þarf að borða og drekka vökva, en maður hefur enga löngun til þess, og maður hugsar ,,aldrei aftur... aldrei aftur!!!" Já, ég er mjög feginn að vera orðinn áhugalaus að mestu fyrir áfengi, sem er líka eins gott fjárhagslega, því að stjórnvöld hækka alltaf og hækka áfengisgjaldið vegna þess að þau hafa svo gaman af því að fá jafn mikið eða minna fé í kassann vegna minnkandi áfengissölu, en í millitíðinni bruggar landinn landa sem aldrei fyrr! En svo ég kafi nú ekki dýpra í leiðinlega pólitík þá verð ég nú að segja að Vífilfell/Víking er að standa sig alveg ótrúlega vel varðandi árstíðarbundna ölið sitt. Víking jólabjórinn er alveg fáránlega góður með þessa fullkomnu blöndu sem er einhvers staðar mitt á milli venjulega bjórsins og hins dökka. Ég mæli hiklaust með honum um jólin og þetta getur selst upp á hverri stundu svo að fyrir fólk sem á einhverja aura, öfugt við sjálfan mig, þá mæli ég með að það drífi sig strax í ríkið! Neinei, vonandi kaupi ég eina kippu eða svo, ég verð að gera það því að ekki fer ég meira á bar á þessu ári, ég einfaldlega get það ekki. Ég verð að eyða óvissunni um atvinnu strax eftir síðasta prófið mitt þann 13. des. því mér finnst ekkert verra en að vera hugsanlega foreldrum mínum byrði. Sama hvar ég enda þá ætla ég að gera gott úr því, vera sáttur og helst að endurgjalda hjálpina sem ég hef fengið á einn eða annan hátt.

Hvað tekur við?

Þá er ég aðeins kominn á skrið í þessu. Ég er búinn að sækja um störf á Þórshöfn, Vopnafirði, Grundarfirði og á Sauðárkróki. Þetta er bara blábyrjunin, ég á eftir að skoða að sækja um á fjölmörgum öðrum stöðum (auk Reykjavíkur til öryggis), en ég læt þetta líklega duga í bili þar til skólinn er búinn og lokaprófin. Eitt er víst, að hvar sem það verður, þá verð ég að fá vinnu strax eftir jól eða áramót. En ég hef þó litlar áhyggjur af þessu enn sem komið er. Þó ég segi sjálfur frá þá er ég stundvís, duglegur og samviskusamur sem er einmitt það þrennt sem flestum vinnuveitendum finnst skipta mestu máli. Svo bý ég yfir reynslu af fiskvinnslustörfum, auk meiraprófs- og lyftararéttinda, þó að ég ætli sannarlega ekki bara að sækja um störf á þeim vettvangi.

E.S. Ég hef ákveðið að læsa blogginu tímabundið með aðgangsorði, svona á meðan ég er að finna mér vinnu, þar sem ég vil ekki vera gúgglaður upp af vinnuveitendum sem gætu lesið eitthvað hér um mig sem þeim líkar ekki við, þið fattið? En ég vona að sjálfsögðu að vinir og vandamenn haldi áfram að kíkja hingað sem fyrr, enda munu þeir fá aðgangsorðið um hæl.

Fínn dagur

Mér finnst vera orðið svo létt yfir mér núna. Ég held að síðustu leifar þunglyndisins séu horfnar því að ég hef sofið vel á nóttunni nú í fjóra daga í röð og ég hef verið nokkuð ferskur yfir daginn. Svo er ég farinn að geta lært og haldið einbeitingunni lengur í einu. Þegar athyglisbresturinn var verstur fyrir nokkrum vikum síðan þá var alveg sama þó ég sæti fyrir framan námsbækurnar klukkutímum saman og reyndi að þvinga mig til að læra, ég áorkaði engu og var sífellt þreyttur. Ég gafst svo upp og fór að sofa bæði dag og nótt og það var þá sem ég uppgötvaði að ég væri líka orðinn þunglyndur, svo slæmur að það eru einhver fimm ár síðan ég var jafn langt niðri. En mér líður vel núna og vaknaði snemma til að ljúka við að ganga frá fyrirlestri sem ég mun líklega halda í skólanum í dag ásamt samnemanda.

Í gær ræddi ég við kennara um í hversu djúpan skít ég er kominn í sumum námsgreinunum vegna einbeitingarskorts og svefntruflana á önninni (en ég minntist reyndar ekki einu orði á þunglyndið, ég hugsaði að líklega væri betra að sleppa því, enda er ég í hröðum bata) og við ræddum um lausnir á vandanum og hvernig ég gæti lokið við að útskrifast þó svo að ég klári því miður ekki allt á önninni. Góðir vinir hafa líka bent mér á að ég geti farið í greiningu og kannski fengið einhverja meðferð eða lyf við athyglisbrestinum og ætla ég að athuga það þegar ég hef efni á því. En það plan sem mér lýst best á í augnablikinu er að byrja aftur að vinna eftir áramót og koma mér í plús, og skrá mig svo í sumarskóla um leið og ég hef aflað mér nógu langs orlofsréttar. Með þessu móti get flutt strax út á land til að vinna en stundað nám í Reykjavík um sumarið. Nema ég verði það heppinn að fá einhverja tímabundna vinnu í bænum, en þá tækla ég kannski stúdentinn í kvöldskóla og fer síðan út á land.

En hvað ætla ég að gera eftir útskrift? Ég hef nokkra spennandi möguleika. Fyrst og fremst vil ég komast í eigið húsnæði. En svo hef ég áhuga á að fara í ferðamálanám og fá réttindi sem leiðsögumaður (þá er eins gott að standa sig í tungumálanáminu). Ég gæti líka farið í landbúnaðarháskólann en ég væri til í að læra eitthvað þar t.d. um fiskeldi, ylrækt eða jafnvel búfræði. Einnig get ég klárað múraranámið mitt, en mig vantar bara herslumuninn upp á að útskrifast sem múrari. Svo væri líklega sniðugt að taka bókfærslunám með þessu. Þetta eru auðvitað frekar ólík fög en öll áhugaverð á sinn hátt og bjóða öll upp á það að geta búið í sveitinni. En það er best að hætta draumórunum í bili og halda áfram með glærusýninguna. Eigið góðan dag