Hamingjan framundan

Hamingjan sanna!! Nú eru Hamingjudagar á Hólmavík framundan næstu helgi og það verður gott að komast loksins aftur í heimsókn til Hólmavíkur, en skrítið að sjá ekkert hús í Höfðagotu 5. Búið er að rífa húsið en það varð ónýtt í brunanum þó það hafi ekki brunnið til kaldra kola. Svona er allt breytingum háð, eins og til dæmis það að það stefnir í að ég muni ekki flytja á Hólmavík aftur til að búa þar til frambúðar, eins og ég hélt að myndi gerast á endanum. Þess í stað er ég nú hér á Króknum að sækja um störf á Vestfjörðum en ég hef hingað til sótt um á Ísafirði og á Bíldudal en þar er mikil og spennandi uppbygging í gangi í áður deyjandi þorpi. Báðir staðirnir eru ægifagrir og ég er búinn að finna það loksins hjá sjálfum mér með dvöl minni hér á Króknum að ég vil helst hvergi annars staðar búa en á Vestfjörðum eða á Ströndum, þó ég hafi yfir engu að kvarta hér (nema laununum á vinnustaðnum mínum!). Þetta verður skemmtileg helgi og ég ætti að hafa efni á bensíninu yfir á Strandirnar því mér hefur þótt ótrúlegt sé verið boðið yfirvinna í tvo daga í röð og það stefnir í þann þriðja á morgun. Ég er líka búinn að skrá bílferðirnar mínar á samferða.is sem ég er nýbúinn að uppgötva að er algjör snilld til að spara peninga og jafnvel fá skemmtilegan félagsskap í leiðinni. Ég var svo að lesa að Bíldudals grænar baunir eru haldnar helgina á eftir Hamingjudögunum svo það er alveg spurning að rúlla þangað þá, sérstaklega í ljósi þess að hátíðin sú er aðeins haldin annað hvert ár. Vill einhver koma með? En jæja, nú verð ég að fara að sofa, meira síðar.

Hress gestur og rafmagnsfjör!

Frábært, æðislegt. Loksins fékk ég gest , þann fyrsta úr fjölskyldunni síðan ég flutti hingað norður fyrir sex mánuðum. Og hann kom með ,,stæl!'' Bergþór Njáll mætti galvaskur með flugi klukkan sex að kvöldi á föstudaginn síðasta. Það munaði litlu að ég yrði of seinn að sækja hann því að Applausinn minn heldur áfram að plaga mig með fleiri og fleiri bilunum, rétt eins og hann viti að ég hyggist selja hann og að hann sé að reyna að koma í veg fyrir að fara til nýs eiganda. En ég vil ekki drepa fólk úr leiðindum sem hefur ekki áhuga á þessu bílaveseni sem er að gera mig gráhærðan svo að ég er búinn að setja þann pakka hérna neðst í færsluna, ég bara varð að fá útrás ! En allavega. Við áttum óborganlega helgi, við grilluðum saman, drukkum öl, rúntuðum um stórt svæði og gerðum margt fleira skemmtilegt. Á laugardaginn fórum við að Grettislaug en þar er afar fallegt. Þar eru brött og formfögur fjöll, bjarg skammt frá sem steypist út í sjó, Drangey örstutt frá og mun tignarlegri en frá Króknum, hestar og önnur dýr á svæðinu og svo auðvitað laugarnar sjálfar (hin náttúrulega Grettislaug og Jarlslaug). Við fengum leyfi til að grilla á staðnum og fengum lánað grill, borð og allt og við grilluðum svínarif sem var auðvitað engin leið að borða nema með höndunum, sem var bara þægilegt. Svo eyddum við löngum tíma í laugunum sem voru vel heitar. Ég dýfði fæti í sjóinn en hann var allt of kaldur ennþá svona snemma í júní, ja ég lagði allavega ekki í þetta að sinni. Svo var haldið til baka á Krókinn (bíllinn hrökk í gang sem betur fer) og fengið sér smá öl. Sunnudagurinn fór aðallega í leti og stuttan útsýnisrúnt upp í skíðabrekkuna við Tindastól og svo meiri leti! En nú voru góð ráð dýr, bíllinn náði að afhlaða sig á örskömmum tíma á meðan við vorum inni og brósa vantaði far til baka út á flugvöll. Ég náði sem betur fer að hlaða geyiminn í nokkrar mínútur og svo tók ég sénsinn að skemma kannski hleðslutækið mitt (sem ég er nýbúinn að kaupa dýrum dómum) og ræsti bílinn með tækið ennþá tengt, og það tókst án skemmda svo að allt endaði vel og brósi komst út á völl í þessa pínulitlu flugvél sem þjónustar Krókinn (öfund!).

 

Varúð, ekki lesa lengra ef þér leiðist bílaröfl!

 

Þessa einu helgi sem Bergþór Njáll var í heimsókn fékk ég start frá þremur ólíkum manneskjum og ég fékk aðstöðu til að hlaða geyminn yfir nótt hjá þeirri fjórðu og kann ég öllum þökk fyrir. Stóra vandamálið með bílinn minn í dag er þetta rafmagnsvesen og ég veit aldrei hvenær bíllinn fer í gang og hvenær ekki. Til að bæta gráu ofan á svart þá er bilaður hitamælir sem á að sjá til þess að sprengihólfin fái rétta bensínblöndu við ræsingu eftir því hvort það er kalt eða heitt úti. Bíllinn fær því oft ranga blöndu og fer ekki í gang fyrr en kannski í annarri eða þriðju tilraun, en þá er ég oft búinn að klára af rafgeyminum og næ ekki að ræsa vélina. Vandamálið stafar af afhleðslu einhvers staðar í öllu rafkerfinu og ég er ráðalaus og hef ekki hugmynd um hvaða vír er að leka allri orkunni. Ég hef meðal annars aftengt allar hurða- og skottperur en það bætti málin ekkert, en það var ekki fyrr en ég hafði skipt um rafgeymi og vandamálið hvarf samt ekki sem ég varð 90% viss um að ég hefði rétt fyrir mér með að þetta væri afhleðsluvandi. Ég hafði alltaf aftengt gamla geyminn eftir hverja ökuferð eftir að ég sá að það að aftengja allar hurða- og skottperur virkaði ekki. Nú var nýji geymirinn kominn í svo ég hætti að aftengja eftir hvern akstur. En eins og fyrr segir var nýji geymirinn skyndilega hleðslulaus í fyrsta sinn á ögurstundu þegar ég var að verða of seinn að sækja Bergþór Njál. Á laugardaginn datt okkur brósa í hug að athuga hvort það væri nóg vatn á nýja geyminum... og við fórum að fikta í honum sem endaði með að núna er ég líklega búinn að skemma geyminn þannig að nú er ekki nóg með að bíllinn afhlaði geyminn ef geymirinn er tengdur við hann, geymirinn sjálfur er farinn að afhlaðast þó hann sé ótengdur, og gerir það bara tvöfalt hraðar tengdur. Nú verð ég semsagt að gefa bílnum start í hvert sinn sem ég þarf að nota hann (eða hlaða geyminn yfir nótt), og ég þori varla að slökkva á bílnum fyrr en ég er aftur kominn heim. Já, í stuttu máli verð ég að henda skrjóðnum á verkstæði og láta finna út úr þessu, (og skipta um öxulhosu og laga pústið, bæði nýbilað) og jafnvel kaupa nýjan geymi! Argh, ég er nýbúinn að þurfa að eyða tugum þúsunda í að láta hjólastilla bílinn (svo dekkin étist ekki upp), fara með hann í skoðun, láta laga erfiðan bensínleka, kaupa föt (sem hefur setið á hakanum síðan áður en ég fór í FB svo ég átti engin heil föt eftir og ég bara varð að versla!) og fara í nauðsynlega tannlæknaferð . Semsagt, von mín um að geta skipt um bíl er að verða að engu því að í stað þess að geta safnað uppí er ég kominn í mínus aftur og ég mun enda á núlli í gróða þegar ég sel þetta kvikyndi! Já, ég var of seinn að skipta.

Júní mættur!

Það er heldur betur orðið bongó núna. Það er farið að vera hlýtt dag eftir dag og snjórinn í fjöllunum bráðnar ógnar hratt þó af nógu sé að taka ennþá reyndar. Ég er búinn að ganga tvisvar á Molduxa, 706  metra fjall sem Sauðárkrókur stendur við (ásamt fjallinu Tindastóli, sem er mun frægara fjall og hærra) og ég er kominn með ferðasýki þó ég sé að reyna að halda aftur af mér eins og ég get til að halda í peningana. Margir vinir mínir eru nýbúnir í prófum og því eflaust ferðasjúkir líka svo ég er vongóður um að rekast á einhverja von bráðar. Við hengdum þorskshausa upp í hjalla til þurrkunar í síðasta sinn í dag í skreiðinni. Það var vissulega mjög forvitnilegt að prófa þessa vinnu og jafnvel gaman á köflum, sérstaklega í góðra manna hópi og í góðu veðri, en ekki á ég eftir að sakna þessarar vinnu að öðru leyti, enda er þetta þungavinna sem er unnin í alls kyns veðri (jafnvel snjóbyl) og maður er með slorið um sig allan, jafnvel í andlitinu. Ef ég hætti hjá Fisk þegar stoppið hefst, sem er lang líklegast, þá eru bara um fimm vikur eftir hjá mér og þá held ég á vit nýrra ævintýra, og satt best að segja þá veit ég enn ekki hvort ég enda á Ísafirði eins og mig langar mest til, eða ég sný aftur á Hólmavík, fer eitthvað allt annað eða fæ jafnvel aðra vinnu hér á Króknum og þá fer ég ekki fet! Þetta veltur allt á því hversu heppinn ég verð með að fá vinnu en ég er opinn fyrir flestu svo lengi sem ég er að vinna mig upp á við á einhvern hátt (eitthvað af þessu eða allt: betri laun, óskastaðsetning, húsnæði sem kostar ekki annan handlegginn, matur í hádeginu, kvöldskóli eða aðrir námsmöguleikar, lágvöruverðsverslun!) Ekki á morgun heldur hinn skrepp ég til Akureyrar í segulómskoðun en þá tekst vonandi að greina hvað er að hrjá mig í höndunum, en greiningarferlið er búið að taka ansi langan tíma. Svo lengi sem ég þrjóskast við en gefst ekki upp á heilbrigðiskerfinu þá hefst þetta á endanum og vonandi á þessu ári. Jæja, ég sé að ég er búinn að skrifa hér í belg og biðu án þess að hafa greinaskil á milli (já ég veit, leti! En ég bloggaði þó ) svo það er best að stoppa núna, ég hendi inn fleiru við tækifæri!

E.S. Ég var að lesa að Hermann Gunnarsson er látinn. Ég á eftir að sakna þess að heyra í honum eða sjá hann í fjölmiðlum. Hann var sannarlega frábær maður, hláturmildur og með hjartað á réttum stað og góð fyrirmynd á svo margan hátt. Mamma mín gerðist svo fræg í vetur að vera í þættinum hans á Bylgjunni í smá stund þar sem hún tók þátt í spurningakeppni ásamt annarri konu og stóð sig auðvitað með glæsibrag og ég get ímyndað mér að það hafi verið gaman að tala við Hemma í eigin persónu. Enginn getur komið í annars stað en allir hafa víst sinn tíma á jörðinni og hans spor á heiminn munu ekki hverfa sem betur fer.

Það sem er að frétta ákkúrat núna

Hvað segist? Þessa stundina er ég staddur í Reykjavíkinni, en ég verð þar fram á mánudagskvöld. Ég fer nefninlega til tannsa á mánudaginn og þar sem ég er enn hjá tannlækni í Reykjavík og hef ekki haft fyrir því að finna mér nýjan úti á landi (kannski aðallega af því að ég hef enn ekki sest að varanlega neins staðar) að þá ákvað ég bara að nota þetta sem góða afsökun fyrir því að taka mér einn frídag frá vinnu og fá þannig einn virkan dag í höfuðborginni til að stússast. Loks verður jaxlinn, sem fylling brotnaði úr, sem var sett í hann, eftir áreksturinn sem ég lenti í sem farþegi fyrir all mörgum árum, lagaður á ný! Já, löng lýsing, en semsagt þá losnaði fyllingin þegar ég var að tyggja karamellu sem ég fékk úr páskaeggi fyrir um 14 mánuðum síðan, og ég hef ekki haft efni á að láta laga þetta fyrr en nú, því að nú er ég ekki lengur fátækur námsmaður, allavega í bili. Í frekara nám verður stefnt á endanum, bara spurning um góða tímasetningu og fjárhag fyrst. Bæði pabbi minn og Sindri eiga afmæli á mánudaginn sem gerir það enn skemmtilegra að geta verið í Reykjavík þann dag, en Sindri hélt reyndar upp á afmælið sitt núna á laugardaginn með bekkjarafmælisveislu sem lukkaðist bara vel hér í Blöndubakkanum. Ég gæti skrifað um svo margt fleira sem hefur gerst eða er að fara að gerast hjá mér, en ég læt það bíða því ég er farinn að geyspa ótæpilega en mér fannst samt að ég yrði að drattast til að skrifa eitthvað hérna því ég er búinn að vera allt of latur á netinu undanfarið. Það er ekki að ég hafi ekki kíkt á netið af og til, ég hef bara varla sést tengdur neins staðar, hvorki á fésbókinni né annars staðar og hef ekkert skrifað. Ég hef nefninlega átt erfitt með svefn í meira en viku og það hefur bitnað á afköstum eftir vinnu, en ég hef rétt svo eldað ofan í mig en annars verið hálf dottandi allan daginn. Samt hef ég aldrei náð góðum svefni fyrr en í gærnótt. Það er vonandi að ég noti næstu tvo daga vel, en það er líklega best að fara að sofa núna svo ég skemmi ekki svefnmynstrið enn á ný. Góða helgi öll og meira síðar!

Sumar, sumar :)

Loksins, loksins, það er komið eitthvað sem líkist sumarveðri. Það var sól, nokkuð hlýtt og næstum logn á Króknum í dag (17. semsagt) og það er spáð góðu veðri um helgina. Nú eru allir á faraldsfæti um hvítasunnuhelgina og sumir jafnvel að fara í fyrstu útilegu sumarsins, en ég fer nú ekki langt held ég því ég verð að standa mig í stykkinu fyrst ég komst upp fyrir núllið. Ég hefði alveg verið til í að skjótast til Reykjavíkur og horfa á Evróvisiónið með fjölskyldunni og kíkja svo í partí hjá vini mínum sem ég veit að verður haldið! En ég á erindi suður um næstu helgi, þá fer ég loks til tannsa á mánudeginum og fyllt verður í jaxlinn þar sem stykkið losnaði er ég aulaðist til að tyggja karamellu sem var í páskaegginu mínu um þar síðustu páska. Nú hef ég efni á viðgerðinni öfugt við þegar þetta gerðist, en þá var ég auðvitað enn í FB og fátækur námsmaður, ekki það að ég sé orðinn ríkur núna hehe. Ég ætti að halla mér aðeins núna, þetta gæti orðið spennandi útivistarhelgi hjá mér hér fyrir norðan því að þó ég fari ekki suður þá er ekkert sem segir að ég kíki ekki í einhvern nágrannabæinn til tilbreytingar. Mig hefur t.d. lengi langað að rúnta á Sigló og Ólafsfjörð. En svo gæti líka verið að ég skelli mér í fjallgöngu, enda loksins komið frábært gönguveður.

Vikan í stuttu máli

Lífið er sannarlega ekki alltaf sanngjarnt. Haraldur frændi minn og Vala áttu von á barni í sumar, en því miður fæddist það nokkrum vikum of snemma. Gabríel Freyr Haraldsson lést um tvem vikum eftir að hann kom í heiminn, næstum alveg fullskapaður, fallegur drengur. Þau skýrðu hann daginn áður en hann kvaddi. Ég fór suður eftir vinnu á þriðjudaginn síðasta og fór í sorglega en fallega jarðarför á Akranesi daginn eftir á sólríkum degi. Þetta er í annað sinn sem þetta gerist og þau eru hetjur að komast í gegnum svona áfall tvisvar. Vonandi gengur þeim allt í haginn framvegis. Fyrst ég var kominn suður og það var frídagur á fimmtudaginn (sem var reyndar færður yfir á föstudaginn í vinnunni) þá tók það því ekki og borgaði sig ekki, að fara aftur norður bara til að vinna í einn dag og koma svo aftur suður til að vera yfir helgina, þannig að ég ákvað bara að missa úr tvo vinnudaga og var í fimm daga fyrir sunnan. Eftir smá yfirferð á bílnum með pabba þá kom ég Applausinum í gegnum skoðun, sem ég bjóst nú ekki við að myndi heppnast, en þetta þýðir að ég get farið að huga að því að setja hann í sölu. Ég náði að hitta fullt af ættingjum og vinum, fór í bíó með frænku minni og fór með mömmu og Sindra í golf en brósi er kominn með mikinn golfáhuga, skemmtilegt nokk, og fær ágætis útrás við að slá kúlurnar hverja á eftir annarri. Ég læt þetta duga í bili, hafið það sem allra best.

Vetur konungur neitar að fara

Þá er kominn maí og með þeim mánuði kviknar von um að nú fari veturinn að gefa eftir fyrir sumrinu. Enn sjást þó engin merki um það hér á Króknum að það sé að koma sumar, ef birtan er undanskilin. Það snjóaði í dag og var skítkalt úti og þó ég hafi yfirleitt lítið á móti vetrinum er ég alveg kominn með nóg í bili. Ég verð að þrauka í eina til tvær vikur í viðbót, þá hlýtur þetta að fara að koma. Ég get farið að gleðjast yfir öðru á meðan ég bíð, en það er það að ég er loksins að verða laus við mínusinn í fjármálunum. Á næstu 1-2 vikum verð ég hættur að nota yfirdráttarheimildina og þá get ég loks farið að safna, en það er betra að eiga einhverjar krónur ef ég ætla að reyna að skipta um bíl, sem er löngu orðið tímabært, eða ef ég verð heppinn og fæ vinnu á Ísafirði en kemst ekki strax í hentugt húsnæði, þá er betra að hafa úr einhverju að moða.

Ég hafði það gott á baráttudegi verkalýðsins og notaði frídaginn í afslöppun og eins í breytingar á herberginu mínu, svo það má segja að ég hafi skipt deginum í tvennt. Ég reisti gestarúmið við á langhliðinni til að stækka gólfplássið hjá mér, en þetta lítur samt snyrtilega út því ég tók lappirnar af og hef teppi yfir og rúmið mitt liggur upp við, þannig að það er komið með bak og virkar því eins og sófi líka. Svo ef ég fæ gest yfir nótt þá er minnsta mál að leggja aukarúmið niður á meðan á heimsókninni stendur.

Það er áhugaverð helgi framundan því vinnufélagi minn ætlar að plötusnúðast á veitingastað einum í miðbæ Króksins á laugardaginn, en staðurinn verður þá væntanlega í kráarbúningi á  meðan. Náungi þessi er frá Ástralíu en flutti hingað með íslenskri konu sinni og er víst flinkur trommari, en hann mun hvíla kjuðana í þetta sinn og spila í staðin sálar, funk og hip hop tónlist eða eins og hann orðar það sjálfur á fésbókarviðburðinum fyrir kvöldið: ,,Come listen to some decent tunes and drink."

Sumardagurinn fyrsti í höfn

Þetta var ágætur fyrsti sumardagur, ég gef honum svona þrjár stjörnur af fimm (kannski aðeins of góður dómur, og þó). Hann hefði fengið fleiri stjörnur ef ég hefði komist í heimsókn til fjölskyldunnar en það bíður betri tíma. Ég breytti út af venjunni svona í þetta sinn og fékk mér hamborgara og franskar og fékk mér svo einn ískaldan léttöl þegar heim var komið. Annars hef ég í marga daga bara eldað eitthvað ódýrt heima eins og grjónagraut, kjötfarsbrauð með pasta, núðlur og slíkt og bíllinn hefur svo gott sem ekki hreyfst... og sjoppur eru algjört bann. Haddi yngri frændi minn gaf mér snilldar ráð til að hafa eitthvað virkilega gott að narta í fyrir lítið af peningum en það er ekki flóknara en að þú kaupir vínber... og setur þau í frysti!!! Þetta er algjört lostæti, að borða frosin vínber er eins og að vera með nammi uppi í sér og það er miklu hollara og ódýrara og svo skemmast vínberin ekki í frystinum. Prófið þetta, namm! Það var svo sannarlega ekki sumarlegt um að litast hérna á Sauðárkróki þennan fyrsta sumardag, en mér var svosem sama, svona er þetta venjulega á Íslandi og alvöru sumarið með hita og sól kemur á endanum, það er alveg öruggt. Ég klæddi mig vel upp, fór í ullarpeysu yfir aðra peysu og setti á mig húfu og vettlinga og skrapp í smá göngutúr og fannst bara hressandi að finna kuldann í andlitinu, þangað til það kom hálfgert haglél í andlitið á mér, það var svona full mikið af því góða. Þetta var svona millistig snjókorna og hagla, frekar sérstakt. Fyrir utan þetta rölt, sem endaði í heilum fimm kílómetrum þvers og kruss um bæinn þá hélt ég mig innandyra í hlýjunni og hafði það bara fínt þar restina af deginum. Ég óska ykkur gleðilegs sumars og vonandi áttuð þið góðan dag.

Hausinn á mér fullur af áætlunum

Þá er enn ein helgin hafin og ég bíð og bíð eftir sumrinu, eins og svo margir. En biðin núna hefur verið erfiðari en áður því að það er mikil óvissa framundan hjá mér. Ég er nefninlega kominn með það á heilann að komast til Ísafjarðar eða nágrennis. Vestfirðirnir kalla á mig, eins og þeir hafa reyndar alltaf gert. Þó Sauðárkrókur sé góður staður þá var það aldrei ætlunin að flytja hingað, heldur aðeins að dvelja hér um skamma hríð (af því að hér fékk ég vinnu) á meðan ég losnaði við yfirdráttinn og fyndi mér vinnu þar sem ég vildi búa til frambúðar og kaupa mér íbúð. Vestfirðir og Strandir hafa alltaf verið þeir staðir sem ég hef fyrst og fremst viljað búa á, en ég væri líka hæstánægður með að búa á Austfjörðum eða á Eyjafjarðarsvæðinu. En ég hringla ekki meir með þetta, Ísafjörður eða nágrenni skal það vera. Þaðan er styttra fyrir mig á þá staði sem ég sæki mest í og góðar flugsamgöngur til Reykjavíkur, þar er ódýrt húsnæði og lágvöruverðsverslun, gott aðgengi að námi, frábær menning og svo margt fleira sem heillar, eins og t.d. fjöllin. Ég er byrjaður að sækja um störf og vona það besta og ef heppnin er með, þá kemst ég vestur í sumar eða haust.

Fyrir utan þetta þá er svona helst að frétta að ég er byrjaður að skokka aftur eftir að hafa jafnað mig á öfga skokkinu fyrr í vetur sem fór alveg með mig. Nú verður vegalengdin höfð styttri og hún verður ekki lengd í bráð. Svo stofnaði ég auka sparireikning til að nota sem ferða- og neyðarsjóð (og söfnunarsjóð til að geta skipt um bíl) en ég held að þetta sé bráðsniðug hugmynd hjá mér, og ég vona bara að ég nái fljótlega að gauka nógu í hann til að gera eitthvað skemmtilegt. Ég held að bílakaup verði það fyrsta sem ég fer í en nú finnst mér loks vera kominn tími til að skipta um bíl eftir að hafa átt Applausinn minn í einhver sjö ár, mér er í fyrsta sinn farið að leiðast bíllinn þó ég beri samt tilfinningar til hans, þetta er klárlega bíll með sál.

Það er líf og fjör í fiskabúrinu mínu en gúbbunum mínum fækkaði fyrst úr sex í fimm að því er virðist (einn karlinn hvarf bara á dularfullan hátt), en fjölgaði á móti um all nokkur seyði og nú hafa fjögur þeirra komist á legg og eitt þeirra er komið með lit í sporðinn. Í vikunni fór ég í göngutúr um bæinn og ákvað að kanna hann betur, og mér til ánægju uppgötvaði ég brattan malarveg sem fer beint upp af húsinu sem ég bý í og alveg upp á hæðina fyrir ofan, og þar er magnað útsýni yfir allan bæinn og hestar á beit sem sýndu mér mikinn áhuga! Alveg ótrúlegt að ég hafi fyrst núna fundið þessa leið, ekki slæmt það þó!

Vonandi fara bræður mínir að geta kíkt í heimsókn til mín, en af þeim þá hafa Bergþór og Sindri haft mestan áhuga og það væri reglulega gaman að fá þá hingað yfir helgi eða lengur. Ég býst þó fastlega við því að þeir komi í sitt hvoru lagi en varðandi Sindra þá verð ég að plana það ferðalag svolítið fyrir hann kallinn. Vonandi verður af þessu í sumar. Jæja, þetta fer að verða heil fréttasíða ef ég hætti ekki núna, hafið það gott og meira seinna.

Laumaðist á Akureyri

Ég stóðst ekki mátið, ákvað að skreppa bara til Akureyrar núna í góða veðrinu þó ég sé í stífum sparnaði þessa dagana. Mig langaði svo að gera mér dagamun. Það er auðvitað lang ódýrast fyrir mig að kíkja þangað ef ég vil kíkja einhvert, aðeins um klukkutíma akstur frá Króknum svo það er töluvert minna mál en að fara til Reykjavíkur eða á Hólmavík. Ég fékk gistingu hjá frænku minni og hef enga sérstaka dagskrá, sem er frábært, þá slappar maður bara af. Það er nú líklega sniðugt að nota tækifærið og versla í Bónus áður en ég fer til baka, það gæti sparað mér einhvern aurinn því það er því miður engin lágvöruverðsverslun á Króknum enn sem komið er. Ég fór til læknis um daginn og er kannski loksins að fara að komast í handagreiningu hjá sérfræðingi. Kannski fæ ég nú loks að vita hvað er að höndunum en ég fór að finna fyrir óþægindum og braki í höndunum á mér svona upp úr 2006, og það hefur hægt og rólega versnað síðan þá og læknarnir í Reykjavík hafa alla tíð hundsað mig og tafið það að ég kæmist í skoðun til bæklunarlæknis, þrátt fyrir að ég hafi trekk í trekk reynt að fá bót minna mála. Vonandi kemur eitthvað út úr þessu núna, ég get ekki beðið eftir að losna við þessa óvissu, ,,hvað er að mér?" og ,,er hægt að gera eitthvað við þessu, eða ekki?" Jæja, ég læt þessi ,,úr einu í annað" skrif mín duga í bili . Góða helgi öll!