Þriðji skokkdagur og gengur vel

Jamm, ég held að þetta hafi tekist hjá mér, skokkið orðið rútína og ég búinn að finna þægilegustu leiðina. Það er ekkert að marka fyrsta skiptið, margir ætla sér stóra hluti og skella sér í ræktina eða út að skokka en svo kafnar allt í fæðingu. Fyrstu tvö skiptin mín fór ég niður í Elliðaárdalinn þar til ég var kominn að Ártúnsbrekkunni (semsagt skokka að endanum á hitaveitustokkinum þar sem hann fer yfir ána) og svo heim. Þetta er mjög falleg og fjölbreytt leið en gallinn við hana er að það eru svo margar brekkur á henni sem hentar ekki á meðan maður á eftir að byggja upp þolið. Það er reyndar hægt að ganga bara brekkurnar og skokka rest sem og ég gerði, en í dag fann ég út að með því að skokka tvo hringi í kringum Bakkana er ég búinn að fara sömu vegalengd og á Elliðaárdalsleiðinni (u.þ.b. 4 km samtals). Sú leið er laus við brekkurnar svo ég ætla að halda mig við hana fyrst um sinn. En því fer fjarri að ég skokki þá leið heldur í einni bunu, ég skiptist á að skokka og ganga, en á endanum á ég að geta tekið þetta án göngunnar. Best að sprengja sig ekki strax!

Fyrsti skokkdagur!

Loksins, loksins! Ég er byrjaður að skokka aftur eftir um það bil tveggja ára hlé. Sá frábæri árangur sem ég náði þá, að léttast um rúm 19 kíló með því að skokka Hólmavík frá gamla bænum út á enda og til baka daglega, allur genginn til baka. Já, ég var kominn niður í 81 kíló. Í dag er ég rúm 100 kíló. Allt út af einhverju rugli. Ég sleppti einhverjum einum degi úr og ætlaði að bæta mér það upp með því að skokka tvöfalda vegalengd daginn eftir, sem og ég gerði. Nokkrum dögum seinna gerðist þetta aftur svo ég skokkaði aftur tvöfalda vegalengd. Svo nokkrum dögum seinna gerðist þetta enn einu sinni, en þá var þetta bara búið spil. Einn dagur varð að tvem og svo þrem og svo framvegis þar til ég áttaði mig á því að ég var einfaldlega hættur. Eins og flestir vita, þá er erfiðasti hlutinn við það að hreyfa sig að byrja! Um leið og hreyfingin er orðin að vana, þá verður hún ávanabindandi og þá er þetta leikur einn þaðan í frá. Ég ætla að koma mér í þetta ástand aftur og dagurinn í dag var dagur númer eitt :)

Rútínan að byrja

Jæja, byrjar ballið aftur. Fyrsti skóladagur vorannar er að hefjast á morgun og ég er með frábæra stundaskrá svo ég er til í slaginn. Ég ætlaði mér of mikið síðast, en engu að síður er ég sáttur við síðustu önn. Ég náði enskunni, íslenskunni, dönskunni, sögunni og sálfræðinni með einkunnirnar 5-9 og er nú alveg búinn mð dönskuna (nían!) en ég féll því miður í lokastærðfræðiáfanganum mínum (stæ. 202) og í spæ.103. En fimm af sjö er engu að síður ágætt. Þessi önn verður rólegri svo ég ætti að geta náð öllu í þetta sinn. Ég geri nú aðra tilraun með spænskuna en ætla að bíða með stærðfræðina til næstu haustannar því að þá hef ég frekar möguleikann á að kaupa mér aðstoð frekar en að hætta á annað fall. Þar sem ég er búinn með dönskuna fækkar tungumálunum niðrí 3 sem er mun viðráðanlegra að eiga við í einu, vandamálið var nefninlega ekki að ég hefði ekki áhuga á spænskunni heldur fylgdi öllum þessum tungumálum allt of mikið heimanám til að ég réði við það í einu.

Ég setti mér ekkert eiginlegt áramótaheit í þetta sinn heldur bjó ég mér til nokkur markmið sem ég ætla að stefna að ákveðið. Eitt af þeim er að sofa nóg, fara nógu snemma að sofa til að vera alltaf útsofinn á morgnana og minnka þessa daglúra. Annað er að læra alltaf strax eftir skóla og eiga kvöldið fyrir mig. Þriðja er að hreyfa mig í lágmark hálftíma á dag með því að hjóla, skokka eða synda. Fjórða er að láta þessa blessuðu örfáu aura sem ég á duga fram á vor, vera ekki að lenda í vandræðum eins og síðast en ég stend nú þegar mun betur en á sama tíma í fyrra svo ég er bjartsýnn með þetta. Svo ætla ég auðvitað að ná öllum prófunum núna, ekki bara sumum. Að lokum væri æðislegt ef ég gæti vanið mig á að teikna eins og eina teikningu eða fleiri á viku því að það er alveg glatað að hafa þennan hæfileika en rækta hann ekki neitt. Jæja, ég held að það sé ágætt að enda færsluna á að óska öllum gleðilegs nýs árs og ég þakka fyrir það gamla. Svo skipa ég ykkur að njóta hvers dags, lifa í núinu og gleyma neikvæðu hlutunum :)

Lokapróf haustannar!

Já, þau eru hafin, og ég er búinn að ná dönsku með úrvalseinkunn (9,0!), en ég er með 99% líkum fallinn í stærðfræði og ég á fimm próf eftir: ensku, íslensku, sálfræði, sögu og spænsku. Ég ætla að ná þeim öllum, að sjálfsögðu :) Tækla svo stærðfræðina næsta haust (gef mér einnar annar og eins sumars pásu til að úthugsa það mál) en ég ætla þá að ná stærðfræðinni almenninlega en ekki með enn einni slefandi fimmunni eins og venjulega. Lifið heil!

Nýtt skólaár hafið

Já, svona gerist þetta, sumarið bara búið á örskotstundu og ég byrjaður á minni þriðju önn af sex. Þannig að eftir þessa önn fer loksins að styttast í seinni hlutann, að því gefnu að ég fari nú ekki að taka upp á því að falla á prófum! Ég er kominn með eitthvað haustkvef eins og venjulega en það verður bara að hafa það, ekkert við því að gera víst. Ég keypti mér nýtt Mongoose Tyax ,Elite`hjól sem hefur reynst mér alveg rosalega vel, enda var það fokdýrt, þrátt fyrir haustafsláttinn. Jæja, ég nenni ekki að tjá mig meira, held ég leggi mig bara eða fari í heitt bað, mér er skítkallt og hausinn er eitthvað skrítinn!!!

Prófatíminn

Nú er allt að gerast. Lokapróf vorannar standa nú yfir af fullum krafti og ég er að fara í síðasta prófið mitt á morgun. Mér hefur gengið ágætlega, bara svona eins og gengur og gerist líklega, mjög vel í sumu en illa í öðru. Ég er búinn að vera sterkur í sögunni, félagsfræðinni, dönskunni og enskunni en veikur í íslenskunni og stærðfræðinni. Það gæti farið svo að ég falli í öðru hvoru af veiku fögunum mínum en ég vona auðvitað það besta. En ef svo fer þá er ég að spá í að athuga hvort ég geti þá ekki tekið það nám í sumarskóla í gegnum netið til að halda áætluninni minni um að útskrifast árið 2012! Ahh, ég finn hreinlega lygtina af sumarfríinu mínu, get ekki beðið eftir að ganga út úr prófinu á morgun og þá kominn í frí með allt stressið að baki. Ég fæ að vita einkunnirnar mínar þann 20. maí en þá verð ég samt byrjaður að vinna þá hjá Hólmadrangi á Hólmavík (byrja 17. maí) en ég ætla bara að leyfa mér að taka mér frí á afhendingardeginum til að geta tekið við einkunnunum beint og farið á prófsýninguna. Ég er enn að hjóla á fullu og í dag náði ég þeim áfanga að vera búinn að hjóla 1003 kílómetra síðan 8. janúar í ár. En jæja, eins gott að halda sig við efnið og klára að læra fyrir félagsfræðiprófið!

Páskar og hjólamennska

Það er eiginlega fyndið að hlakka svona til páskanna þegar maður ætlar ekki einusinni í ferðalag eða að gera neitt sérstakt í fríinu. En málið er að þegar maður er í skóla eins og er tilfellið með mig núna, þá er fríið svo gullið tækifæri fyrir mig til að undirbúa mig fyrir prófin svo ég geti síðan bara verið rólegur og áhyggjulaus í prófunum sjálfum sem verða ekki svo löngu eftir páska. Semsagt, ég ætla bara að slappa af heima og fara yfir námsefnið og jú líka stunda heimsóknir og ekki síst, hjóla á fullu.

Það greip mig algjört hjólaæði eftir jól þegar ég ákvað að fara að spara peninga og taka fram hjólið mitt góða og skella undir það nagladekkjum. Ég smurði það líka og styllti og keypti á það blikkljós að framan og aftan sem fara sjálfvirkt í gang þegar ég hjóla af stað og hætta einnig sjálfvirkt að blikka svona 2 mínútum eftir að ég stöðva hjólið, þau eru líka með skær díóðuljós sem eru nánast eilíf svo ég þarf aldrei að skipta um peru og ég þarf ekki einusinni að skipta um rafhlöður því að ljósin nota segla til að hlaða sig á meðan ég hjóla. Þægindin í kringum þessi ljós gætu semsagt ekki verið meiri, og þessi ljós fást í Íslensku fjallahjólabúðinni (GÁP) ef einhver er áhugasamur! Nagladekkin hafa einnig gefist mjög vel og ég hef getað hjólað í alveg glærahálku af öryggi í þau fáu skipti sem það hefur komið einhver hálka í vetur.

Fatnað þurfti ég ekki að kaupa mér því ég hef átt lengi ágætis vind og regnheldan jakka og buxur og Elsa Rut prjónaði á mig þessa fínu húfu líka. Annars er betra að vera frekar minna klæddur en meira, en hanska nota ég alltaf, sama hvernig viðrar því vindkælingin á puttana getur orðið svakaleg. Að sjálfsögðu gat ég ekki sleppt því að kaupa líka mæli á hjólið fyrst ég var farinn af stað í þetta allt en mælirinn hefur hvatt mig mikið áfram í hjólamennskunni því að ef maður sér kílómetrana tikka inn þá á maður oft erfitt með að fara ekki að keppa við sjálfan sig. Til sönnunar á því þá hef ég núna hjólað samtals 563 kílómetra síðan ég tók hjólið í notkun í janúar!

Mest hef ég hjólað um 50 km. á einum degi en oftast hafa löngu hjólatúrarnir mínir verið í kringum 30 km. Ég er farinn að fara flestra minna ferða á hjólinu, ég hjóla í skólann (bara 1,6 km. leið), út í búð (ef ég er að versla eitthvað smálegt), í bankann, lyfjabúð, í heimsóknir og svo framvegis. Bara síðan í janúar er ég búinn að spara mér 9.000 krónur með því að velja oftar hjólið en bílinn.

Og brekkurnar? Finn ekki fyrir þeim, ég fer í lægsta gírinn og svo sný ég pedölunum bara hægt og rólega upp brekkurnar og maður er kominn á jafnsléttu aftur áður en maður veit af. Maður á ekki að hamast upp brekkurnar, annars hættir maður að nenna þessu. Það er miklu skemmtilegra að hamast þegar komið er á jafnsléttu eða maður er að fara niður á við! Þá er minnsta mál að halda allt að 30 kílómetra hraða á jafnsléttunni án mikillar fyrirhafnar og enn meiri hraða á niðurleið, allt að 50-60. Metið mitt er reyndar 70 (ohh, það var æðislegt og mér fannst hraðinn miklu meiri!!) en á slíkum hraða á reiðhjóli er líka eins gott að vera vakandi fyrir umhverfinu svo að ekki hljótist slys af! En neinei, þetta eru auðvitað bara öfgarnar, meðalhraðinn er oftast mun lægri en þó tekur enga stund að skjótast á milli á fjallahjólinu. Mæli með þessu, það er æðislega hressandi, vetur sem sumar.

Nýtt ár!

Jæja, á maður ekki að reyna að halda þessu bloggi eitthvað lifandi. Það er meira búið að gerast undanfarna mánuði en ég nenni að telja upp núna í einni færslu svo ég læt það bara bíða. Ætli ég mjatli því ekki frekar hingað bara smám saman. Það merkilegasta sem er búið að gerast hjá mér síðan ég bloggaði síðast er auðvitað það að ég náði öllum prófunum í þessu námi mínu. Ég fékk semsagt 5 í stærðfræði, 6 í íslensku, 7 í upplýsingatækni, 8 í félagsfræði, íþróttum og fjölmiðlafræði og svo fékk ég heila 9 í dönsku sem er náttúrulega bara magnað miðað við hversu illa mér gekk í henni í Iðnskólanum á sínum tíma! En sú einkunn sem ég grét samt af gleði yfir að fá, jafnvel þótt það hafi verið sú lægsta, var fimman í stærðfræðinni, enda hef ég áður fallið tvisvar í áfanganum en hef nú loksins komist yfir þann erfiða þröskuld. Ég get ekki hugsað til þess ef ég hefði orðið að taka stærðfræði 102 í fjórða skiptið, það hefði verið svo ömurlegt. En semsagt, ég er bara hress og kátur á nýja árinu og óska öllum sem ég þekki gleðilegs nýs árs og takk fyrir það gamla :)

Smölun :)

Jæja, þá er loksins komið að því, ég er að fara norður á Hólmavík, í fyrsta sinn síðan 7. ágúst (átti leið þar um þegar ég var að keyra frá Flókalundi til Dalvíkur, löng saga!). Þetta er hræðilegt, enda er ég kominn með „heimþrá“ á háu stigi. Mér mun alltaf finnast að ég eigi líka heima á Hólmavík eftir þessi tvö ár sem ég bjó þar. Reyndar hef ég búið mun lengur þar, því ef allt er tekið saman hef ég átt heima þarna í u.þ.b. 5 ár eða 1/5 æfinnar, því ég bjó þarna sem smápolli líka, hér og þar um bæinn (í Höfðagötunni, Lækjartúninu og Brunnagötunni). Allavega, ég er að fara í smölun og réttir um helgina og þá get ég líka notað tækifærið og sótt vonandi restina af dótinu mínu sem er ennþá í gamla herberginu mínu í Brunnagötunni, svo ekki sé talað um nagladekkin, má ekki gleyma þeim! Mér gengur ágætlega í skólanum og mér líður vel í honum, en það verður gott fyrir mig að komast núna í annað umhverfi um helgina því að síðan skólinn byrjaði hefur eiginlega allur minn vökutími snúist um hann, líka um helgar því maður er alltaf eitthvað að stússast í blessuðu heimanáminu. En meira seinna, skrifa örugglega góða færslu hingað fljótlega, um sumarið og öll ferðalögin, næst þegar ég er í stuði :)

Júlíbloggfærslan :P

Alveg magnað, þetta sumar hættir ekki að koma á óvart :)

Það hefur sjaldan eins margt gerst hjá mér á einu sumri og núna, og það á sama tíma og ég er ekkert að skrifa hérna! En þið verðið að sætta ykkur við það, ég hef bara haft um allt of mikið að hugsa og gera til að hafa haft tíma í eitthvað svona. En hér kemur þó það helsta sem er að frétta af mér.

Síðasta vinnudeginum mínum hjá Hólmadrangi lauk núna á sunnudaginn, og lýkur þar með tveggja ára starfsferli mínum þar, en ég er líka að fara af vinnumarkaðnum núna í fyrsta sinn í 6 ár. Og ég sem ætlaði bara að taka mér árs frí eða svo frá skóla! Vúps, eitthvað teygðist úr þessu ári, en jæja, ég er allavega að bæta úr þessu núna :)

Að sjálfsögðu hélt ég upp á þessi tímamót að vera hættur með nokkrum öllurum um kvöldið, en svo tók það strax við daginn eftir að pakka niður og byrja að flytja mína fátæklegu búslóð suður, en ég er semsagt nýfluttur núna til Reykjavíkur bara síðan á mánudaginn. Ég og fleiri erum búnir að flytja nokkra bílfarma af draslinu mínu suður, en ég á samt eina ferð eftir til að sækja restina, en svo verður nú líka smölun í haust og svona, þannig að ég fer nú aldrei alveg í burtu! Ég þakka Hafþóri kærlega fyrir herbergið á Hólmavík, það var alveg frábært að búa þarna og ég á eftir að sakna þessa litla en huggulega herbergis, og bara íbúðarinnar í heild...já og auðvitað Hólmavíkur...og fólksins! :)

Nú get ég varla beðið. Ég er að fara á Þjóðhátíð í Eyjum með kærustunni (já ég er kominn í samband ef einhver ekki veit) og ég er ekkert smá spenntur, enda er þetta mín fyrsta ferð til Eyja! Kærastan fór með Herjólfi núna í nótt en ég fer með flugi í dag því ég var svo seinn að ákveða að skella mér að það var allt orðið uppselt með Herjólfi og ég var ekki nógu duglegur að redda mér miðum. En ef ég hefði verið fyrr á ferðinni hefði ég frekar kosið Herjólf, aðallega bara uppá stemninguna að gera :) Ég er búinn að frétta það að það verður fullt af fólki þarna sem ég þekki og svo segja allir að Þjóðhátíð sé eina vitið í ár þannig að það er eins gott að ég ákvað að skella mér! Þetta er allt saman mjög spennó :D

En þetta verður að duga í bili. Meira í ágúst, vonandi :P