Tússtafla

Í dag keypti ég litla tússtöflu. Fékk allt í einu þá flugu í höfuðið að ég gæti notað hana til að æfa mig í að skrifa látlaust niður beygingar á spænskum sögnum og þurrkað þær jafnóðum út. Sleppa semsagt við allt pappírsflóðið svona þegar hægt er. Svo er ég kominn með nagla uppi á vegg fyrir framan rúmið þannig að ég get látið töfluna hanga þar með nýjum spænskum orðasamböndum og slíku. Tja, eða bara einhverju öðru sem ég þarf bráðnauðsynlega að muna hvað og hvað skiptið. Svo bind ég líka nokkra von við spænska bloggið mitt þar sem ætlunin er að spreyta sig á spænskunni flesta daga. Það á vonandi eftir að halda mér betur við efnið og hraða náminu. Auk þess er það kostur að hafa þetta sér til að drekkja ekki þessu bloggi og svo verður það eins og hálfgerð námsdagbók þar sem ég get alltaf kíkt aftur á gamlar færslur til upprifjunar. En nóg af spænskublaðri í bili! Ég skal ná!!!

Sannarlega ofstækissamtök

 http://www.mbl.is/frettir/innlent/2011/10/20/likir_storu_systur_vid_ofstaekissamtok/

Þær vilja láta loka Einkamálum.is, hvaða rugl er þetta? Ég var með kærustu í tvö ár sem ég kynntist í gegnum þessa síðu, sem er það besta sem hefur hent mig á æfinni. Ég þekki líka fólk af báðum kynjum sem kynntist makanum sínum í gegnum þessa stefnumótasíðu. Þannig að mín samstaða með þessum konum er núna engin og ég tek undir með Brynjari að þetta eru ofstækissamtök. Ekki rétta leiðin. Þeir sem kalla Einkamál.is ,,sorasíðu'' eru að mynda sér skoðun um eitthvað sem þeir vita ekki nóg um til að geta gert það. Þetta er alhæfing og alhæfingar flokkast undir fordóma. Svartir sauðir eru alls staðar og þeir myndu finna sér annan vettvang til að fremja glæpi þó að Einkamálum.is yrði lokað. Aftur á móti, ef Einkamálum.is yrði lokað myndu þúsundir missa frábæra leið til að finna ástina.

Sumarið búið án skrifa og ný haustönn hafin :P

Þetta er svakalegt, hámark letinnar. Ekkert skrifað hér á heilu sumri! En nú er ný skólaönn hafin og það sem er svo frábært við það er að nú hef ég hreint borð og ef ég held rétt á spöðunum frá upphafi þá verða lokaprófin streitulaus og eins og að drekka vatn! Kem kannski með einhverjar sumarsögur hér með tíð og tíma :)

¿Cómo estás hoy?

Eða: hvað segirðu gott? ;)

Ég var að koma úr munnlegu prófi annarinnar í spænsku hundrað og þremur og ég held að mér hafi bara gengið ágætlega. Allavega gat ég svarað meirihluta spurninganna og lesturinn var ekkert allt of slæmur en því miður gleymir maður alveg ótrúlega oft að bera ákveðna stafi öðruvísi fram en gert er í íslenskunni eða hvaða öðru máli sem er yfirleitt. Spænskan er örlítið sér á báti með sín tvöföldu ell sem þýða samt joð og sín hljóðlausu há eða joð sem gefa frá sér allt annars konar hljóð en joð hljóð o.s.frv! En allavega, skólinn sleppur enn fyrir horn hjá mér og ég er enn ekki búinn að klúðra neinu alvarlega þó stundum hafi mátt litlu muna! Lærdómsgenið í mér hlýtur að hrökkva í gang fyrr eða síðar eða allavega fyrir útskrift. Ég veit að það býr meira í mér en þetta og að ég get verið meira en bara tossi sem rétt nær öllum prófum. Ég náði öllu með þvílíkum glæsibrag á mínum fyrstu önnum en svo fór því miður að halla undan fæti og nokkur föll eru staðreynd. En ég ætla að klára, engar áhyggjur, ég gef ekkert eftir til að það takist. Spænskan gengur nú þegar mun betur en í klúðrinu í fyrra og ég er enn sem komið er fyrir ofan fimmurnar í kaflaprófunum. En ég vil gera betur. Ég hef mikinn áhuga á að verða mælskur á mínu þriðja tungumáli og spænskan er bæði spennandi og nokkuð falleg auk þess að vera mjög gagnlegt tungumál því hún er annað eða þriðja stærsta mál heimsins. Pælið bara í heiminum sem opnast fyrir manni til dæmis á internetinu þegar maður er búinn að ná tökum á þessu og hvað það verður skemmtilegt að fara til Spánar næst. Þá verð ég kominn með ríka ástæðu til að kíkja þangað til að æfa mig, en ég gæti líka allt eins heimsótt flest öll löndin í Ameríku í sömu erindagjörðum, sérstaklega þó suðrið!

Fertugasti og fyrsti skokkdagur!

Sko, þetta tókst hjá mér! Ég er enn að skokka og mér líður miklu betur fyrir vikið bæði andlega og líkamlega. En því miður tókst mér ekki að skokka hvern einasta dag eins og ætlunin var heldur eru skokkdagarnir í raun aðeins tuttugu og níu talsins og letidagarnir urðu tólf. En ,,planið'' er alveg óbreytt áfram fyrir því, að skokka alla daga. Annars missir maður endanlega stjórnina á þessum letidögum.

Þriðji skokkdagur og gengur vel

Jamm, ég held að þetta hafi tekist hjá mér, skokkið orðið rútína og ég búinn að finna þægilegustu leiðina. Það er ekkert að marka fyrsta skiptið, margir ætla sér stóra hluti og skella sér í ræktina eða út að skokka en svo kafnar allt í fæðingu. Fyrstu tvö skiptin mín fór ég niður í Elliðaárdalinn þar til ég var kominn að Ártúnsbrekkunni (semsagt skokka að endanum á hitaveitustokkinum þar sem hann fer yfir ána) og svo heim. Þetta er mjög falleg og fjölbreytt leið en gallinn við hana er að það eru svo margar brekkur á henni sem hentar ekki á meðan maður á eftir að byggja upp þolið. Það er reyndar hægt að ganga bara brekkurnar og skokka rest sem og ég gerði, en í dag fann ég út að með því að skokka tvo hringi í kringum Bakkana er ég búinn að fara sömu vegalengd og á Elliðaárdalsleiðinni (u.þ.b. 4 km samtals). Sú leið er laus við brekkurnar svo ég ætla að halda mig við hana fyrst um sinn. En því fer fjarri að ég skokki þá leið heldur í einni bunu, ég skiptist á að skokka og ganga, en á endanum á ég að geta tekið þetta án göngunnar. Best að sprengja sig ekki strax!

Fyrsti skokkdagur!

Loksins, loksins! Ég er byrjaður að skokka aftur eftir um það bil tveggja ára hlé. Sá frábæri árangur sem ég náði þá, að léttast um rúm 19 kíló með því að skokka Hólmavík frá gamla bænum út á enda og til baka daglega, allur genginn til baka. Já, ég var kominn niður í 81 kíló. Í dag er ég rúm 100 kíló. Allt út af einhverju rugli. Ég sleppti einhverjum einum degi úr og ætlaði að bæta mér það upp með því að skokka tvöfalda vegalengd daginn eftir, sem og ég gerði. Nokkrum dögum seinna gerðist þetta aftur svo ég skokkaði aftur tvöfalda vegalengd. Svo nokkrum dögum seinna gerðist þetta enn einu sinni, en þá var þetta bara búið spil. Einn dagur varð að tvem og svo þrem og svo framvegis þar til ég áttaði mig á því að ég var einfaldlega hættur. Eins og flestir vita, þá er erfiðasti hlutinn við það að hreyfa sig að byrja! Um leið og hreyfingin er orðin að vana, þá verður hún ávanabindandi og þá er þetta leikur einn þaðan í frá. Ég ætla að koma mér í þetta ástand aftur og dagurinn í dag var dagur númer eitt :)

Rútínan að byrja

Jæja, byrjar ballið aftur. Fyrsti skóladagur vorannar er að hefjast á morgun og ég er með frábæra stundaskrá svo ég er til í slaginn. Ég ætlaði mér of mikið síðast, en engu að síður er ég sáttur við síðustu önn. Ég náði enskunni, íslenskunni, dönskunni, sögunni og sálfræðinni með einkunnirnar 5-9 og er nú alveg búinn mð dönskuna (nían!) en ég féll því miður í lokastærðfræðiáfanganum mínum (stæ. 202) og í spæ.103. En fimm af sjö er engu að síður ágætt. Þessi önn verður rólegri svo ég ætti að geta náð öllu í þetta sinn. Ég geri nú aðra tilraun með spænskuna en ætla að bíða með stærðfræðina til næstu haustannar því að þá hef ég frekar möguleikann á að kaupa mér aðstoð frekar en að hætta á annað fall. Þar sem ég er búinn með dönskuna fækkar tungumálunum niðrí 3 sem er mun viðráðanlegra að eiga við í einu, vandamálið var nefninlega ekki að ég hefði ekki áhuga á spænskunni heldur fylgdi öllum þessum tungumálum allt of mikið heimanám til að ég réði við það í einu.

Ég setti mér ekkert eiginlegt áramótaheit í þetta sinn heldur bjó ég mér til nokkur markmið sem ég ætla að stefna að ákveðið. Eitt af þeim er að sofa nóg, fara nógu snemma að sofa til að vera alltaf útsofinn á morgnana og minnka þessa daglúra. Annað er að læra alltaf strax eftir skóla og eiga kvöldið fyrir mig. Þriðja er að hreyfa mig í lágmark hálftíma á dag með því að hjóla, skokka eða synda. Fjórða er að láta þessa blessuðu örfáu aura sem ég á duga fram á vor, vera ekki að lenda í vandræðum eins og síðast en ég stend nú þegar mun betur en á sama tíma í fyrra svo ég er bjartsýnn með þetta. Svo ætla ég auðvitað að ná öllum prófunum núna, ekki bara sumum. Að lokum væri æðislegt ef ég gæti vanið mig á að teikna eins og eina teikningu eða fleiri á viku því að það er alveg glatað að hafa þennan hæfileika en rækta hann ekki neitt. Jæja, ég held að það sé ágætt að enda færsluna á að óska öllum gleðilegs nýs árs og ég þakka fyrir það gamla. Svo skipa ég ykkur að njóta hvers dags, lifa í núinu og gleyma neikvæðu hlutunum :)

Lokapróf haustannar!

Já, þau eru hafin, og ég er búinn að ná dönsku með úrvalseinkunn (9,0!), en ég er með 99% líkum fallinn í stærðfræði og ég á fimm próf eftir: ensku, íslensku, sálfræði, sögu og spænsku. Ég ætla að ná þeim öllum, að sjálfsögðu :) Tækla svo stærðfræðina næsta haust (gef mér einnar annar og eins sumars pásu til að úthugsa það mál) en ég ætla þá að ná stærðfræðinni almenninlega en ekki með enn einni slefandi fimmunni eins og venjulega. Lifið heil!

Nýtt skólaár hafið

Já, svona gerist þetta, sumarið bara búið á örskotstundu og ég byrjaður á minni þriðju önn af sex. Þannig að eftir þessa önn fer loksins að styttast í seinni hlutann, að því gefnu að ég fari nú ekki að taka upp á því að falla á prófum! Ég er kominn með eitthvað haustkvef eins og venjulega en það verður bara að hafa það, ekkert við því að gera víst. Ég keypti mér nýtt Mongoose Tyax ,Elite`hjól sem hefur reynst mér alveg rosalega vel, enda var það fokdýrt, þrátt fyrir haustafsláttinn. Jæja, ég nenni ekki að tjá mig meira, held ég leggi mig bara eða fari í heitt bað, mér er skítkallt og hausinn er eitthvað skrítinn!!!